Amyusha rawt malan hpung ningbaw ningla ni Laiza zuphpawng de rawt

Wunpawng Mungdan Shanglawt Hpung (KIO) ginjaw Laiza kaw galaw na Myen mung amyusha rawt malan hpung ni a hkrum ra zuphpawng de amyusha rawt malan hpung 16 na ningbaw ningla ni rawt sa nga sai lam chye lu ai.

Lai wa sai bat htum wa kaw nna nkau Myen asuya uphkang ai Myitkyina lam hku hte nkau Miwa mung hku nna Laiza de hkrunlam hkawm nga sai lam, Htai mung Chiang Mai mare KIO shiga lawk tsun ai.

Zuphpawng hpe July 24-26 laman galaw na masat tawn ai hta, madung Myen ginjaw asuya kawn dip n-gun jaw nga ai ‘mungdan ting madang gap hkat jahkring ai lam hpe daphpawm hku nna hkap la na n hkap la na ntsa’ bawngban dawdan sa wa na masa nga ai lam, KIO ginjaw dat kasa hpung ningbaw Sara Kaba Sumlut Gam tsun ai.

Masum ya zuphpawng mahkyen ma hkra hpe amyusha rawt malan hpung ni a mungdang ting madang gap hkat jahkring bawngban jahkrung hpung, NCCT kawn lit la galaw na re.

Ndai zuphpawng de sa lawm ai laknak hpai hpung 16 hta UNFC amyusha hpyen masa mungmasa daphpawm malawm 12 hte UNFC hta n lawm ai uhpung 4 re lam chye lu ai. Wa amyusha rawt malan hpung UWSA gaw n lawm ai lam KIO ginjaw salang ni hpe lakap let chye lu ai.

Kaga zuphpawng madat lawm na shaga tawn ai hta, Myitkyina daju simsa lam lam akyu galaw hpung PCG (Peace-talk Creation Group) mung lawm ai lam PCG salang ni tsun ai re.

PCG htaw wa htaw sa lit la
Zuphpawng hpang ai kawn ngut ai ten du hkra, Myen asuya uphkang ai Myitkyina kawn Laiza de zuphpawng lawm dat kasa ni yawng a htaw wa htaw sa lit hpe PCG simsa lam akyu galaw hpung kawn hkam ya ai chye lu ai.

Myitkyina-Laiza pran htaw wa htaw sa ya na matu, NCCT kawn PCG hpe jahpan jaw da ai marai 50 daram raitim kaja wa gaw marai 70 daram du na re lam PCG malawm Salang Lamai Gum Ja KNG Jinghpaw Shiga Dap de tsun ai.

Ndai htaw wa htaw sa lit a matu PCG gaw Myitkyina kaw nga ai Jinghpaw lauban launa ni a Toyota Land Cruiser hte Mitsubishi Pajero yawng 20 daram hkyen da sai lam chye lu ai re.

Bai nna dat kasa ni a Myitkyina bungli pa hte manam jarawp lapran htaw wa htaw sa lit la ai sha n ga, manam shara ni hpe mung lajang ya nga ai lam Salang Lamai Gum Ja tsun wa ai re.

Kng