K.I.O Ginjaw Laiza Padang Gawknu Hta K.I.O Asuya Kaw Nna Mung Ya Yang Na Masa Sanglang Hpaw Galaw

Dai ni Sep 3, 2014 ya shani hta KIO ginjaw Laiza Padang Gawknu hta jahpawt daw 7:00am ten ram kaw nna 10:40am ten ram du hkra ya yang na Myen asuya hte bawngban nga ai Mung masa lam, gap hkat jahkring lam hte Simsa lam yan ni hpe sang lang hpawng galaw ai lam shiga na chye lu ai. Ndai Mung masa sanglang
hpawng hta Laiza Buga Laiza Muklum na mung mare masha ni hte rau KIO/KIA Magam Dap, Makan Dap shagu na Hpa-awn ni yawng marai (600) daram sa du madat hkam la ai lam na chye lu ai.

Ndai Zuphpawng hta KIA Dap Awn Daju Du Kaba Sumlut Gun Maw kaw nna ya yang Myen hte matut manoi galaw nga ai gap hkat jahkring lam, Mung masa lam hte Simsa lam ya ni hpe azin ayang sanglang ai dan mat wa ai lam na chye lu ai.

Du Kaba Gun Maw Tsun ai hta Myen asuya hte Myen Mung rawt malan hpung ni a "Nationwide Ceasefire" gap hkat jahkring bawngban lam hte seng nna Lawng Lam Kaba (7) nga ai hta Lawng Lam kaba (1) hpe sha naw bawng ban jahkrup myit hkrum da ai re lam, kaga ngam ai Lawng Lam kaba (6) gaw naw bawng ban sa wa ra ai lam, aten grai naw la ra na re lam, gap hkat jahkring lam ya jang rai nmai byin shi ai lam, Grai naw bawng ban la ra ai lam, Mung masa hkam dahka nnga ai sha gap hkat jahkring ta masat ka na nre lam, Mung masha ni mung KIO hpe kam nga na lam, myit naw galu hkam sharang ra ai lam, kyu hpyi garum ai hte lam shagu hta hpaji jaw garum shaingtau shang lawm ra ai lam ni hpe tsun shana mat wa ai lam shiga na chye lu ai.

Myutsaw kasa